Iloilo City: Taxi driver nga Nagbalik sa Cellphone sang iya Pasahero, Nakabaton sang Padya!
Jocelyn Gelloagan-Maque
Madamo sang nagdayaw kay Mr. Arthur Arguelles, 43-anyos sang Ungka II, Pavia kag driver sang Sean John taxi, matapos sini ginbalik ang cellphone sang iya pasahero nga nabilin sang nagligad nga semana.
Suno kay Arguelles, nakita man sini gilayon ang cellphone sang nagpanaug ang pasahero nga si Kristine Joy Gepanayao sang Guimbal apang wala na nabalik bangud may napick-up siya nga pasahero. Ginhingagaw lang sini hapit sa aksyon radyo ang cellphone agud mabalik sa tag-iya.
Gin-ako ni Arguelles nga bisan pigado siya, wala gid siya natentar nga taguon ang cellphone.
Bangud sang tampad nga ginhimo ni Arguelles, daku ang pagpasalamat sang tag-iya nga naghatag man sa iya sang reward.
Ginhatagan man ini sang Aksyon Radyo sang gamay nga kantidad kag may negosyante nga nagpromisa nga magahatag sang gasolina sa iya unit bilang pagkilala sa maayo nga binuhatan sang taxi driver.