Rally sang mga mangunguma, napun-an sang tension matapos ginpunggan sang anti-riot police nga magdiretso sa venue sang APEC meetings

Iloilo City–Nagluntad ang tension sa tunga sang mga mangunguma nga raliyesta kag anti-riot police matapos gintuyo sang grupo sang Bukluran ng Progresibong Magbubukid sa Pilipinas (BPMP) nga magpadulong sa Mandurriao agud magprotesta sa ginahiwat nga APEC ministerial meetings kahapon.

Ginabanta sa duha ka libo ka mga raliyesta halin sa nagkalain-lain nga banwa sa probinsya sang Iloilo kag Capiz ang nag-martsa padulong syudad.       Suno sa isa sa mga lider sang BPMP, luyag nila ipanawagan sa mga delegado sang APEC nga wala nagahatag sang kaayuhan sa mga mangunguma ang ginatalakay nila nga meeting angut sa food security

Gintumod diri ang pag-promote sang genetically-modified organism ukon GMO crops. Ginpunggan sang mga pulis sa atubang sang Jaro Big Market tubtub sa Jaro Plaza ang mga raliyesta kag ginhambalan nga indi na magpadayon. Apang ginpahayag nga nagpanghaboy sang mga bato ang mga protesters kag nagtuyo pa magbato sa mga kapulisan.

Bangud sa natabu, nagpangakig si Iloilo Police Provincial Office (IPPO) Director Sr/Supt. Cornelio Salinas sa grupo. Lakip si Salinas sa walo ka mga pulis nga napilasan sa pagpanghaboy sang mga bato. Gindakup kag ginpreso si Joel Gepaya, chairman kag coordinator sang ALAB Katipunan Panay kag nagapangatubang sang sampaw-sampaw nga kaso bangud sa natabu. (Aine Grace Bravo)