Salakyan nga ginbilin sa approach sang Iloilo Bridge sa Diversion Road Mandurriao, nagtuga sang perwisyo sa mga Pasahero kag Motorista

Iloilo City — Dako ngha perwisyo ang ginhatag sang driver nga nagbilin sang puti nga Nissan Sentra sa approach sang Iloilo Bridge sa Diversion Road, Mandurriao kaina sang aga.

Suno kay Superintendent Alexander Rosales, head sang Task Group on Transportation sa APEC meetings, kuntani ginpahibalo sang driver nga si Warren Calaor, 25-anyos sang Cabaas Street, Leon ang PNP personnel kag traffic aide san TMTRO nga naaberya ang iya salakyan agud madula ang kabalaka sang mga otoridad.

GIn-inspection sang Explosive and Ordnance Division sang NCR Regional Safety Battallion nga ginapangunahan ni Senior Inspector Joseph Escoro ang salakyan agud mapat-od nga wala sang bomba.

Samtang ginahimo ang inspection, wala naman ginpaagi sa tuo nga parte sang dalan padulong sa syudad ang mga salakyan nga nagresulta sang pagpugok sang trapiko.

Pasado alas 10 na kaina sang natukiban nga wala naga-andar ang salakyan bangud guba ang alternator.   (JoMaque)