Nag-rally sa Jaro Plaza ang mga barkers kahapon agud ipalab-ot ang ila demand sa syudad.

Suno kay Chief Inspector Gilbert Gorero, hepe sang Jaro Police Station, gina-demand sang mga barkers nga himoon kinse mil pesos sa baylo nga singko mil pesos lang ang ihatag nga financial assistance agud i-capital sa negosyo. Gin-demand man sang mga barkers ang pag-release gilayon sang bulig pinansyal. Ginbanta naglawig sa 30 minutos ang rally sang mga barkers.

Ginpahayag ni Gorero nga matawhay nga natapos ang rally matapos niya gin-istorya kag ginpa-intiende nga may ginapatuman nga laye. Ginpabutyag sini nga dapat paminsaron sang mga barkers nga maswerte sila bangud sang ginhatag nga bulig sa ila sang syudad.

Labe nga naapektuhan ang water delivery sang Metro Iloilo Water District (MIWD) sa mga konsumidor sa pag-untat sang operation sang treatment plant sang JE Hydro, subcontractor sang Flo Water nga contractor sang bulk water supply project.

Suno kay MIWD Interim General Manager Pablo Bercilla, magluwas nga kulang ang gina-supply nga tubig sang Flo Water, gina-problema man ang pagkaayo sang mga guba nga tubo sangMIWD. Ginpahayag ni Bercilla nga kinahanglan makapangita sang solusyon sa problema ang Flo Water kag JE Hydro agud liwat nga maka-operate ang planta.

Gin-untat sang JE Hydro ang operation sang treatment plant matapos wala nakabayad sang 1.7 milyones pesos nga utang ang Flo Water.

Iga-take over sang Metro Iloilo Water District (MIWD) ang operation sang treatment plant kon maglawig sang 48 oras ang problema sang bulk water supplier nga Flo Water kag subcontractor nga JE Hydro.

Suno kay MIWD Interim General Manager Pablo Bercilla, nasaad sa ila kontrata sa Flo Water nga mahimo i-take over sang MIWD ang operation sang planta apang bayaran sang Flo Water ang cost of operation. Ginpahayag sini nga bisan nadala sa MIWD board ang problema kag wala gihapon nakabayad ang Flo Water sa JE Hydro, wala sila sang mahimo kundi sundon ang nabutang sa kontrata.

Apang nagalaum gihapon si Bercilla nga mabayaran sang Flo Water ang JE Hydro agud makumpleto ang 6-month operation sang treatment plant.

Arestado ang duha ka kawatan sa Jaro kahapon.

Nadakpan sa akto sanday Carlito Haba sang Bakhaw, Mandurriao kag Romel Rabar sang Ajuy nga nagsulod sa bodega sang South Pacific Construction sa Taytay Zone 2, Jaro.

Presu na ang duha sa karsel sang Jaro Police Station kag natalana kasuhan.

Dakpon na ang mga barkers nga makita nga magapadayon sa pagpangtawag sang pasahero sa dalanon sugod subong nga adlaw.

Kahapon nagtakop ang ginhatag nga plaso ni Mayor Jed Patrick Mabilog sa mga barkers agud indi na magbalik sa dalanon bangud hatagan sila sang financial assistance agud makasugod sang bag-o nga palangabuhian. Sa final briefing kahapon sa Iloilo City Police Office, ginmanduan ni ICPO OIC Sr/Supt. Ruperto Floro ang mga station commanders kag Traffic Investigation and Enforcement Section (TIES) sang ICPO nga dakpon ang mga nga barkers sa dalanon.

Nagtambong sa briefing si Mr. Jeffrey Celiz, executive assistant for political affairs ni Mayor Mabilog, taga-City Social Welfare and Development Office (CSWDO), Mr. Rizal Alido kag Mr. Boyet Parcon sang transport group ICLAJODA kag tiglawas sang Transporation Management and Traffic Regulation Office (TMTRO).

Indi pagpresuhon ang madakpan nga barker apang ipablotter sila agud makasuhan sa paglapas sang city ordinance kun indi makabayad sang multa.

Isa pa ka empleyado ni Congressman Augusto Syjuco ang nag-resign sa trabaho.

Suno kay Ms. Corazon Taladua, epektibo Pebrero 1 ang pagresign niya bilang staff sang kongresista.  Ginpahayag ni Taladua nga halos 10 ka tuig siya nga nagserbe kay Syjuco bilang financial officer samtang political affairs officer 2 kag legislative research specialist 1 ang iya item sa Kamara.

Ginrason ni Taladua sa pagresign ang indi paghatag sang iya ensakto nga sweldo. Indi man ma-agwantahan ni Taladua ang pagtrabaho sang 24 oras apang wala ginahatag ang ila ensakto nga sweldo. Una na nga nagresign ang political liaison sang kongresista nga si Mr. Roy Cerilo.

Ginpahayag ni Taladua nga nagalab-ut sa 2.3 milyones pesos ang kuluhaon halin sa talatapanni Syjuco. Base ini suno kay Taladua sa computation sang kabug-usan nga ginkapon sa iya sweldo sugod sang nagbaton siya sang sweldo sa House of Representatives. Sa service record ni Taladua sa kamara, 32 mil 717 pesos kuntani ang iya batunon kada bulan lakip na ang allowances apang 12 mil pesos lang ang ginahatag sa iya nga sweldo sang chief of staff ni Syjuco sa Iloilo nga si Rosemarie Sionosa.

Magasapol subong nga adlaw ang City Social Welfare and Development Office (CSWDO) kag Iloilo City Police Office (ICPO) agud plantsahon ang listahan sang mga barkers sa syudad.

May kaangtanan ini sa pagtapos ginhatag nga plaso ni Mayor Jed Patrick Mabilog sa mga barkers agud indi na magbalik sa mga dalanon bangud hatagan sila sang financial assistance agud magpangita sang iban nga palangabuhian. Istoryahan man sa sinapol ang detalye sa pag-operate sang Traffic Investigation and Enforcement Section (TIES) sang ICPO agud dakpon ang mga barkers nga makita gihapon sa mga dalanon pagkatapos sang plaso.

Naglab-ot sa 87 ka barkers ang na-profile sang CSWDO sa bug-os nga syudad.

Nagaproblema naman ang syudad sa supply sang Metro Iloilo Water District (MIWD).

Ini sa pihak sang pagsugod sang bulk water supply project sang MIWD nga kabahin sa solusyon sa kakulang sang supply sang tubig sa syudad. Suno kay Mayor Jed Patrick Mabilog, may mga nagareklamo nga nagdyutay ang supply sang MIWD. Nakabaton sang impormasyon ang alkalde nga naglupok ang linya sang MIWD sa Jaro bangud wala nasarangan ang pressure sang tubig halin sa bulk water supplier. Nagpanawagan si Mabilog sa MIWD nga solusyunan gilayon ang problema.

Samtang nagpasar sang resolusyon ang Liga ng mga Barangay sa syudad nga nagapanawagan kay Mabilog nga padayunon ang pagdeliver sang tubig sa kabarangayan.

Patay ang lalaki nga natiruhan sang wala makilala nga suspek sa Brgy. Camangay, Legenes kagab-e.

Patal nga pilas sa guya ang naagom ni Jun Wanilyo, 31-anyos sang amo man nga lugar. Gindala pa sa ospital ang biktima apang napatay.

Gina-imbestigaran na sang kapulisan ang motibo sa pagpatay kay Wanilyo kag identity sang suspek.

Estable na ang kondisyon sang 23-anyos nga lalaki nga nabun-an sang mga pangayaw sa kafiestahan sang Bangga Bante, Zarraga kagab-e.

Napilasan sa tuo nga kilid si Mark Vincent Robo sang Balud Uno, Zarraga nga confine sa Western Visayas Medical Center. Nadakpan kag presu na sa karsel sang Zarraga Police Station ang mga suspek nga sanday Romuil Anson, 23-anyos kag Elvin Magarso, lunsay taga-Tubang, Maasin.

Narekober sa posisyon sang mga suspek ang kutsilyo nga gingamit sa pagbuno sa biktima. Suno kay PO1 Emmanuel Maodi sang Zarraga Police Station, nasal-an lang ang biktima matapos may nagluntad nga komosyon.