Igapresentar ni Mayor Jed Mabilog ang syudad sa bidding sang mga possible sites sa APEC meetings halin Disyembre 2014 tubtub 2015. Ginkumpirmar ni Department Of Tourism ukon DOT 6 director Atty. Helen Catalbas nga natalana ang bid presentation sa Manila sa Mayo 27 kag 28. Ginpabutyag ni Catalbas nga si Mabilog ang magapresentar para sa Iloilo City bangud maayo maghambal kag mag-engganyo. Magluwas sa Iloilo City, magabid man ang Bacolod City kag Boracay halin sa Western Visayas. Siyam ka mga lugar ang maga-bid tanan agud mapilian nga isa sa mga venues sang APEC meetings.

Nagsugod subong nga adlaw ang national school maintenance week ukon ang Brigada Eskwela sang Department of Education.

Ang Brigada Eskwela ang isa ka semana nga pagpaninlo sang mga eskwelahan bilang preparasyon sa pagbukas sang klase. Gin-engganyo ni DepEd Region 6 Director Dr. Mildred Garay ang mga stakeholders nga magpasakup sa pagpaninlo.

Ginsuguran ang Brigada Eskwela paagi sa caravan nga gin-updan sang mga opisyal sang DepEd sa syudad kag probinsya, mga ginikanan, city officials kag iban pa nga stakeholders.

Pilason ang mag-iloy sang ginbuno sang ila himata nga ginpahayag may nervous breakdown sa Brgy. La Fortuna.

Ginsaway ni Prenel Banabatac ang magulang nga si Noli nga indi pagkakason ang spareparts sa ila kuliglig. Apang wala natalupangdan ni Prenel nga may kutsilyo ang magulang gani nahandusan siya kag napilasan sa kamot kag ilong. Nagtuyo nga magpatunga ang ila iloy nga si Leny apang ginbuno man rason nga napilasan sa leog. Napilasan man ang suspek matapos nagbato sa mga nagkugos sa iya agud maagaw ang kutsilyo kag mapakalma.

Ginpahayag nga malaka lang naga-inum sang iya maintenance si Noli rason nga gin-abot sang nerbyos. Padayon nga ginabulong sa ospital ang mag-iloy.

Ginlabu sang iya man lang amay ang 25-anyos nga lalaki sa Barangay Bakhaw, Mandurriao kaina sang kaagahon.

Napilasan sa kamut si Johnsen Balerey sang amo man nga lugar nga confine  sa Western Visayas Medical Center.

Hinubog ang ginpahayag ginhalinan sang insidente.

Ginhold-up ang negosyante sa Brgy. Sta Rosa, Guimbal kahapon. Ginkilala ang biktima kay Hernani Abaygar sang Brgy. Caitib, Miag-ao kag naga-buy and sell sang mga kasapatan.

Suno kay Po2 Joni Pionda sang Guimbal PNP, halin sa syudad ang biktima sang ginhold-up sang duha ka lalaki nga nakasakay sa motorsiklo.  Ginpahayag gintayaan sang ginaalegar 38 kalibre nga pusil ang biktima sang isa sa mga suspek kadungan sang pagdeklara sang hold-up.

Nakuha kay abaygar ang wallet sini nga naga-unod sang 40 mil pesos nga cash. Madasig nga nagpalagyo ang mga suspek pakadto sa poblacion sang guimbal kag padayon nga at large.

Pilason ang asawa matapos ginbuno sang bana sa Brgy. Salvacion, Balasan. Ginkilala ang biktima kay Alyas Lin nga napilasan sa leog, kamot, tiil sang ginbuno sang bana.

Ginpahayag nga hubog ang bana sang may nagluntad nga bina-isay tubtub ginbuno sini ang iya asawa.

Madasig nga nagpalagyo ang bana samtang padayon nga ginabulong sa ospital ang asawa.

Nangin maayo ang pagsugod sang 1^st International Pamunit Festival sang Pamunit Festival Association, Dept of Tourism (DOT 6)  kag Munisipalidad sang Oton kahapon. Assessment ini ni DOT 6 Director Atty.  Helen Catalbas sa diin indi lang sa probinsya kag syudad sang iloilo ang mga partisipante kundi naghalin man sa Makati, Cebu kag mga US balikbayans.

Ginpahayag ni Catalbas nga bisan indi madamo ang partisipante, madinalag-on gihapon ang pagsugod sang amu nga festival bangud gindugukan ini sang madamu nga tawo. Magluwas sa pamunit, may mga side events man kasubong sang porma balas ukon sand sculpting competition, beach volleyball kag football kag photo exhibit sang nagkalain-lain nga dive sites sa Western Visayas.

Gin-athag ni Catalbas ang rason kun ngaa napilian ang oton nga hiwatan sang pinakauna nga International pamunit festival.  Bangud ini suno sa iya sang pagbutang sang Bureau of Fishieries and Aquatic Resources (BFAR)  6 sang 200 ka artificial coral reefs sang nagligad nga tuig agud mangin puluy-an sang mga isda.

Ginpahayag sini nga 200 mil pesos ang balor sang mga artificial coral reefs nga ginbutang sang BFAR 6 kag  lakip man sa nagbulig hatag sang pundo si Governor Arthur Defensor kag ang Munisipalidad sang Oton.  Gin-cordon ang lugar sa diin ginbutangan sang artificial reefs agud masiguro nga indi matandog kag makamu-ad sang husto ang mga isda.

Ginpahanumdum sang City Commission on Elections (Comelec) ang tanan nga kandidato nga mag-file sang Statement of Contributions and Expenditures (SOCE). Nasaad sa SOCE ang tanan nga nabaton nga donasyon kag gingasto sang kandidato sa eleksyon kasubong sang presyo sang mga ginpahimu nga posters kag leaflets kag bayad sa mga nagpanakod kag nagpanagtag sini lakip na ang gasto sa rekorida.

Suno kay City Comelec Supervisor Atty. Jomar Betita, sa Hunyo 12 ang deadline sang filing sang SOCE. Ginpahayag ni Betita nga mahimu makakuha sang form sang SOCE sa City Comelec Office ukon mahimo maka-download halin sa webiste sang ahensya.

Dugang ni Betita, iga-countercheck sang Bureau of Internal Revenue (BIR) ang mga gindeklara nga SOCE agud mausisa kun insakto. Ginpahayag sini nga indi dapat pagbalewalaon ang deadline sa pag-file sang SOCE. May mga sanctions suno sa iya sa pag-file sang late nga SOCE.

Ginpaandaman man sini ang mga kandidato nga maga-binutig sa pag-fill up sang SOCE. May ginapalagaw ang Comelec nga campaign finance monitoring team nga nagapangusisa sang mga presyo sa paghimo sang campaign paraphernalia kag kun pila ang gasto sa rekorida agud makumparar kun nagasanto ini sa gindeklarar nga SOCE sang mga kandidato.

Indi makabaton sang Priority Development Assistance Fund ( PDAF) ang mga board members nga indi magsuporta sa administrasyon ni Governor Arthur Defensor.

Reaksyon ini ni Defensor sa pamangkot kun anu ang matabo sa mga nagdaug nga board members nga indi niya kaalyado.

Particular nga ginpalabtikan sang gobernador ang mga board members sang United Nationalist Alliance  (UNA) nga sanday Board Member Shalene Palmares-Hidalgo sa 4^th district kag Board Member Jesus Salcedo, Jr.  sang 5^th district.

Madumduman nga antes pa ang eleksyon, may mga board members sang UNA party nga wala ginhatagan sang PDAF nga amu sanday BM Jerry Flores, Jett Rojas kag Hidalgo.  Ginrason sang gobernador nga kinahanglan mag-ugyon ang tanan ilabe na ang kontra-partido para sa kaayuhan sang mga pumuluyo sa probinsya.

Bukas sa rekonsilasyon si Governor Arthur Defensor sa iya kasumpong nga si Congressman Ferj Biron.

Pahayag ini ni Defensor matapos ginpahibalo ni 4th District Congressman-elect Hernan Biron Jr nga handa ini magserbe nga tulay para sa kaayuhan sang iya magulang kag sang gobernador. Suno kay Defensor, normal lang sa pulitika ang rekonsilasyon sang mga nagkontrahanay nga pulitiko pagkatapos sang eleksyon.

Apang ginpahayag sang gobernador nga wala pa nagpabatyag si Cong. Biron nnga luyag man sini sang rekonsilasyon. Gin-athag ni Defensor nga napatawad na niya si Biron sa mga ginhimo sini sa iya kag dapat kalimtan na ang nagligad para sa kaayuhan sang probinsya.