Gin-alegar nga gindis-armahan sang mga tinawo sang mag-utod nga pulitiko ang duha ka pulis nga nagresponder sa call-up sa Barangay Bagacay, San Dionisio, Iloilo. Ginpahayag ni IPPO-Iloilo Police Provincial Office Provincial Director Senior Supt. Renato Gumban sandig sa bersyon sang kapulisan sa San Dionisio PNP nagresponder ang 5 ka pulis sa barangay Bagacay bangud ginreklamo nga ginabalabagan sang mga tinawo nanday Punong Barangay Bebot Lopez, kandidato sa pagka-mayor kag sang iya utod nga si Vice Mayor Peter Paul Lopez ang mga tawo nga naga-agi sa dalan sakup sang ila hacienda. Apang pag-abot sa lugar gina-alegar gintutukan sang pusil ang lima ka pulis sang ginabanta 10 tubtob 15 ka tinawo sang duha ka pulitiko kag gindis-armahan ang duha ka pulis nga sanday PO1 Reselviv de la Cruz kag PO1 Kenneth Alayon. Wala sang nahimu ang lima ka pulis bangud mas madamu ang mga nagatutuk sa ila sang pusil kag delikado nga malamita ang mga sibilyan kabangdanan nagpabaya kag nagbalik sa precinto kadungan sang paghinyu sang reinforcement. Suno kay Gumban nadakpan nila ang suspek nga nagdis-arma sa duha ka police nga nakilala kay Rumiter Buga, brgy. tanod kag detain subong sa IPPO. Nabalik man ang duha ka armas nga gindis-arma sa mga pulis. Natalana pasakaan sang nagakaigo nga kaso ang tanan nga matumod may kahilabtanan sa natabu dugang ni Gumban.