Aksyon Radyo Iloilo

City Hall Report: Antiqueña Out, Tengco In sa TMTRO!

admin — Wed, 22 Feb 2012 22:57:26 +0000

Ginkakas na ni Mayor Jed Patrick Mabilog ang kontrobersyal nga si Mitch Antiqueña bilang officer-in-charge sang Transportation Management and Traffic Regulation Office (TMTRO).

Wala na gin-renew sang alkalde ang appointment ni Antiqueña nga nag-expire kahapon. Suno kay Mabilog, indi na konektado sa TMTRO kag city government si Antiqueña sugod subong nga adlaw. Ginbulos ni Mabilog bilang TMTRO OIC si Division Chief Engr. Joe Tengco.

Nagpasalig naman si Tengco nga himuon ang tanan agud mapa-ayo ang dalagan sang trapiko sa syudad. Ginpahayag ni Tengco nga sapulon niya ang mga traffic supervisors kag patambungon ang mga traffic aides sa seminars kag refesher course. Ginpanugyanan man ni Tengco ang iya mga tinawo nga respetuhon ang kinamatarung sang mga drivers kag pasahero. Nagpa-andam pa ang bag-o nga TMTRO OIC nga suspenderon ukon pahalinon sa serbisyo ang traffic aide nga nagatinunto.

Capitol Report: Appointment ni Jerry Bionat bilang Department Head sang PDRRMC, Gin-aprubahan na sang Sangguniang Panlalawigan

admin — Wed, 22 Feb 2012 22:50:49 +0000

Gin-aprobahan sang Sangguniang Panlalawigan ang appointment ni Jerry Bionat bilang department head sang Provincial Disaster Risk Reduction and Management Council (PDRRMC).

Antes nangin department head si Bionat, boluntaryo siya nga nagpangalagad bilang executive director sang Provincial Disaster Coordinating Council kag secretary sang PDDRMC. Nakumbinser ang mga miembro sang provincial board nga aprobahan ang appointment ni Bionat bangud sang iya experyensya sa disaster preparedness.Natestingan man ang ikasarang ni Bionat sang gintay-og sang mabaskog nga linog ang kapitolyo sang Pebrero 6.

Antes ginpirmahan ni Governor Arthur Defensor ang appointment ni Bionat, siya man ang section chief sang Provincial Cooperative Development Office.

Iloilo City: (UPDATE) Mga Suspek nga Nagtiro kag Nagpatay sa Trisikad Driver sa City Proper, Ginpasakaan na sang Kaso!

admin — Wed, 22 Feb 2012 22:47:20 +0000

Ginpasakaan na sang kaso kahapon ang duha ka suspek nga nagtiro kag nagpatay kay Roy Flores alyas Batman.

Kaso nga murder ang ginpasaka batuk kanday Leo de Flor sang Barangay Badiangon, Roxas City kag Rommel Mamon sang barangay Ilong Bukid, San Rafael. Positibo nga ginkilala sang 13-anyos nga testigo ang duha ka mga suspek nga nagtiro sa biktima.

Nagasakay sa trisikad ang biktima sang gintuparan sang mga suspek nga nagasakay sa motorsiklo kag gintiro sa hawak, kilid kag dughan resulta sang iya kamatayon.

San Jose, Antique: (POLICE REPORT) Lalaki, Dakup sa Buybust Operation!

admin — Wed, 22 Feb 2012 22:44:15 +0000

Arestado ang lalaki sa buybust operation sang Antique Special Operations Group sa San Jose kagab-i.

Ginkilala ang suspek kay Mario Atrisa sang Zone 3, Barangay Divinagracia, Lapaz. Nabaklan si Atrisa sang duha ka plastic sachet sang suspected shabu. Narecover man sa iya posisyon ang duha pa ka elongated sachet sang suspected shabu.

Preso na si Atrisa sa karsel sang San Jose Police Station.

2012 SCUAA Olympics Update!

admin — Wed, 22 Feb 2012 13:47:17 +0000

Medal Standing by Region as of February 22, 2012
Region Gold Silver Bronze
1. NCR - 37 18 20
2. Region 6 - 10 13 10
3. Region 3 - 8 8 9
4. Region 4 - 6 7 21
5. Region 9 - 5 2 4
6. Region 10 - 3 0 3
7. Caraga - 2 11 4
8. Region 5 - 2 3 6
9. Region 1 - 1 11 1
10. Region 2 - 1 0 0
11. Region 7 - 1 1 2
12. Region 12 - 0 1 0
13. Region 8 - 0 1 2
14. ARMM - 0 0 0
CAR - 0 0 0
Region 11 - 0 0 0

Iloilo City: Iloilo City Prosecutors Office, Plano Magsaylo sa Terminal Market!

admin — Tue, 21 Feb 2012 23:45:14 +0000

Ginkonsiderar sang Iloilo City Prosecutors Office kag mga City Courts ang pagsaylo sa Iloilo Terminal Market pagkatapos nga magsaylo sang opisina ang mga city councilors sa bag-o nga city hall building. Kasunod ini sang assessment ni Department of Public Works and Highways ukon DPWH Planning Division Assistant Chief Engr. Cecil Caligan nga indi na safe teniran ang building kabangdanan ginarekomendar nila ang pag-abandonar. Plano man sang Iloilo Provincial Prosecutors Office nga maghalin sa Iloilo Sports Complex. Ginatarget naman sang Regional Trial courts ang paghalin sang opisina sa De Paul College apang wala pa sang pat-od kon san–o gid mahalin bangud gina-negosyar pa ang terms sa arkila sa building nga ginpahayag tuman ka mahal.

Iloilo City: 2 ka Suspek sa Pagpatay, Arestado!

admin — Tue, 21 Feb 2012 23:42:17 +0000

Nadakpan na ang duha ka suspek nga gin-alegar nagtiro kag nagpatay kay Roy Flores alyas Batman sa City Proper. Nadakpan sanday Leo de flor sang Brgy. Badiangon, Roxas City kag Rommel Mamon sang Brgy. Ilong Bukid, San Rafael sa follow-up operation sang kapulisan. Positibo nga ginkilala sang 13 anyos nga testigo ang duha ka mga suspetsado nga amo ang nagtiro sa biktima. Nagasakay sa traysikad ang biktima sang gintuparan sang duha ka suspek nga nagasakay sa motorsiklo kag gintiro sa hawak, kilid kag dughan resulta sang iya kamatayon. Padayon nga gina-imbetigaran sang mga pulis ang motibo sa pagpatay sa biktima.

2012 SCUAA Olympics Update!

admin — Tue, 21 Feb 2012 18:44:36 +0000

Medal Standing by Region as of February 21, 2012
Region Gold Silver Bronze
1. NCR - 11 10 13
2. Region 4 - 5 6 7
Region 6 - 5 6 7
3. Region 9 - 5 2 4
4. Region 3 - 2 4 2
5. Caraga - 2 1 2
6. Region 1 - 1 3 0
7. Region 5 - 1 1 2
8. Region 10 - 1 0 1
9. Region 2 - 1 0 0
10. Region 12 - 0 1 0
11. Region 7 - 0 0 1
12. Region 8 - 0 0 1
13. ARMM - 0 0 0
CAR - 0 0 0
Region 11 - 0 0 0

2012 National SCUAA Olympics, Ginbuksan na!

admin — Mon, 20 Feb 2012 04:20:30 +0000

Iloilo City– Ginabanta sa 5 mil ang kabug-usan nga numero sang mga delegado sa 2012 State Colleges and Universities Athletic Association ukon SCUAA Olympics nga ginbuksan na kahapon. Ginpahayag ni Western Visayas College of Science and Technology ukon WVCST President Dr. Luis Sorolla, nagdamo ang delegasyon sang iban nga rehiyon rason nga naghimo sila sang adjustment sa mga billeting areas agud ma-akomodar ang tanan nga delegado. Nagdugang ang numero sang delegasyon sang iban nga rehiyon bangud madamo ang luyag nga makakita kag makalagaw sa Iloilo.

Iloilo City: Hall of Justice, Dapat I-abandonar suno sa DPWH 6!

admin — Mon, 20 Feb 2012 04:09:41 +0000

Ginrekomendar sang Department of Public Works and Highways ukon DPWH ang maid-id nga assessment sa Ramon Q. Avancena Hall of Justice kag ang pag-abandonar sa building samtang ginahulat pa ang resulta sang imbestigasyon. Suno kay DPWH Planning Division Assistant Chief Engr. Cecil Caligan, indi safe nga teniran ang building kabangdanan ginarekomendar nila ang paghalin sang mga empleyado. Ginpahayag ni Caligan nga bisan pa sa 2nd floor lamang ang nakit-an nga kahalitan sang linog apang kinahanglan nga i-abandonar ang building para sa kaluwasan sang mga empleyado. Ginpresentar man ni Caligan kay Senador Franklin drilon kahapon ang resulta sang rapid evaluation sa building kasunod sang intensity 5 nga linog sang Pebrero 6. Nagpasalig man ang senador sang bulig sa pagpakay-o sang building. Na-draft naman ni Caligan ang rekomendasyon nga ipadala sa central office sang DPWH.