Nakabaton sang gold award ang syudad sang Iloilo sa bag-o lang natapos nga “Liveable Communities Award” sa Chicago, Illinois USA. Ini ang maayo nga balita nga ginpa-abot ni Mayor Jed Patrick Mabilog sa mga Ilonggo paagi sa Aksyon Radyo Iloilo. Sa interview kay Mabilog direkta sa Washington DC, ginpahayag sang alkalde nga nakuha sang Iloilo River Development Project ang gold medal. Bangud sa bag-o nga kadalag-an, mahimo na mapresentar ang proyekto sa international communities kag mapangayuan sang pondo. Naghatag man ini sang panghangkat sa city government agud maghimo pa sang mga pama-agi agud malimpyuhan ang Iloilo River para sa mas maayo nga pala-abuton. Madumduman nagpadulong sa Estados Unidos si Mabilog upod ang iya entourage sang Nobyembre 2 kag natalana magabalik sa syudad sa masunod nga semana.