Bastante ang supply sang bugas sang National Food Authority ukon NFA sa Western Visayas sa pihak sang epekto sang el niño sa mga humayan sa Iloilo. Ini ang ginpasiguro ni Vilma Zarraga, Asst Regional Manager sang NFA sa Western Visayas. Suno sa iya, may mandate sila para sa buffer stocks kabangdanan naga-import sila sang bugas sa Vietnam agud indi mawad-an sang supply ang rehiyon. Apang aminado si Zarraga nga nagnubo ang volume sang mga humay nga ginabaligya sa NFA bangud sang el niño.

Tatlo na ka probinsya sa Iloilo ang apektado sang el niño phenomenon sandig sa pinakaulihe nga record sang Department of Agriculture Region 6. Ginalakipan ini sang Iloilo, Antique kag Guimaras. Sa Iloilo, naglab-ot sa 22 mil 95.56 ka ektarya sang duta ang apektado sang el niño ukon 518 milyones 488 mil 56 pesos kag 63 sentimos nga balor sang kahalitan. Mas mataas ini ipaanggid sa 393.57 ka ektarya sang duta nga apektado sang el niño sa Guimaras kag 339.61 ka ektarya sang duta sa Antique. Apang mas mataas ang balor sang kapierdehan sa Antique nga naglab-ot sa 8 milyones 873 mil 83 pesos kag 22 sentimos ipaanggid sa Guimaras nga naglab-ot lang 3 milyones 210 mil 900 pesos. Suno kay Engineer Remelyn Recoter—Regional Technical Director sang DA region 6, ginabanta 26 mil ka mga mangunguma sa tatlo ka probinsya ang apektado sang tig-ilinit. Padayon nga gina-validate sang ahensya ang mga lugar nga apektado sang el nino phenomenon.