Ginhabuyan sang granada ang Carlos Bakeshop nga ginapanag-iyahan sang pamilya ni Iloilo City Mayor Jerry Treñas sa Brgy. Dungon A, Jaro. Wasak ang puertahan sang bakeshop kag pilason ang Security Guard nga si Carlo Ganancial. Suno kay  Punong Barangay Genoveva Cabulong sang Dungon A , Jaro nabatian niya ang lupok pasado alas 2:00 sang kaagahon, Lunes, Marso 8, 2010 kag sang gin-usisa nahabuyan sang granada ang Carlos Bakeshop. Naabtan pa ni Cabulong ang Security Guard nga pilason kabangdanan gindala niya sa hospital. Suno sa mga nakasaksi duha ka lalake nga nagasakay sa motorsiklo ang naghaboy sang granada nga madasig nagpalagyo. Ginapatihan ni Mayor Treñas pulitika ang rason sang insedente.

Naglapta sa mga kabarangayan sa siyudad sang Iloilo ang mga streamers sa diin makit-an ang caricature ni Mayor Jerry Treñas. Ang kabayo nga may nawong ni Treñas, ginasakyan sang tawo nga ang hitsura kapareho kay Boarding House Commission Chairman Edward Yee kag may ginadala nga latigo. Ang kabayo ginaguyod sang kapitan kag nagatindak sa casual employee. Ginpahayag ni City Comelec Officer G Bert Arbis, ginadumilian ang mga caricature nga nagaguba sa mga kandidato. Mahimo suno sa iya maka-file sang petisyon sa Comelec ang apektado nga kandidato agud mapakakas ang mga nagalapta nga caricature. Apang gin-athag ni Arbis nga ma-apply pa lang ini sa national level bangud nakasugod na ang campaign period para sa national positions kag indi sa local level. Ginpanugyanan ni Arbis si Mayor Treñas nga pasakaan sang kaso civil sa korte ang mga natumod niya nga nagpalapta sang caricature. Gipahayag naman ni Congressman Raul Gonzales Jr, ang caricature ni Treñas, pamaagi lamang sang protesta sang mga ginpangkakas nga casual employees sa city hall nga natapos na ang kontrata.

Nagkulurog sa kakulba ang mga kabataan ni Mayor Jerry Treñas matapos gin-alegar gintayaan sang pusil kag ginpahog sang hubog nga police sang nagbisita sila sa mga nasunugan sa Barangay Nabitasan Lapaz. Si PO1 Ronnie Refugio ang ginatudlo sang mga kabataan sang alkalde nga nagsita sa ila kag sa iban pa nga miembro sang Blue Angels nga ila kaupod sa pagpadulong sa lugar. Si Refugio ang ginpahayag bodyguard ni Congressman Raul Gonzales Jr. May kaangtanan sini, hingyuon ni Mayor Treñas nga ipaidalum sa kontrol sang commission on elections ang siyudad sang Iloilo. Resulta ini suno sa iya sang tuman nga pagka-dismaya niya sa pagdalahig sa iya mga kabataan sa away pulitika. Suno sa alkalde, magapadala siya sang sulat kanday Comelec Chairman Jose Melo kag PNP Chief Director General Jesus Verzosa nga magahingyo nga ipaidalum sa Comelec control ang Iloilo City. Plano sang alkalde nga kasuhan si PO1 Refugio.

Batunon ni Chief Presidential Legal Counsel Raul Gonzalez Sr. si Iloilo City Mayor Jerry Treñas kun magdesisyon ang alkaldei nga magbalik sa ila grupo.
Suno kay Gonzales, ginakabig niya nga bata si Treñas bangud ginpadako niya ini sa pulitika rason nga handa siya nga batunon liwat ang alkalde.
Apang gin-athag ni Gonzalez nga pagkabise alkalde lang ang matanyag kay Treñas ukon ang anuman nga posisyon nga itanyag sa iya sa national government kun magdaug ang pambato sang administrasyon sa presidential race.