ILOILO CITY — Nag-ako ang miembro sang Special Tactics and Response (STAR) team sang Bureau of Jail Management and Penology (BJMP) sa Nanga, Pototan nga siya ang nagtiro kay Hernani Caspillo sa Brgy. Ungka, Jaro kahapon sang hapon, Setyembre 17.
Nag-surrender sa police si Senior Jail Officer 1 Reynaldo Palma, 52 anyos sang Zone 2, Brgy. Ungka, Jaro.
Suno kay Maj. Eduardo Siacon, Jr. OIC sang Jaro Police Station, ginpahayag ni Palma nga papuli na siya halin sa duty sa Nanga, Pototan sang may nagpangayo sa iya sang bulig tungod may komosyon.
Nagdiretso siya sa Zone 5 kag naabtan nga nagapukutay si Caspillo, nga may bitbit nga binangon, kag ang tanod nga si Romel Jacome. Gin-istorya niya si Caspillo nga untatan na ang paglabu sa tanod apang pati siya ang gintuyo man nga lab-on.
Sang ginhanaan siya nga lab-on, napilitan si Palma nga tiruhon si Caspillo sang duha ka beses gamit ang iya issued firearm nga 9mm Glock.
Palaligban pa sa police kun sin-o ang nakapalupok sang .45 caliber nga pusil tungod may na-recover man nga mga basiyo sang bala nga compatible sa .45 caliber.
Nahibaluan nga live-in partner ni Caspillo ang utod ni Jacome nga si Christy.
Una na ginpahayag ni Christy nga naglisensiya lang si Caspillo nga manguha sang isda sa suba pero may nagpahibalo sa iya nga natiruhan ang iya live-in partner.
Base sa mga nakasugid kay Christy, naga-inum-inom si Jacome sa balay sang ila tanod commander tungod may birthday.
Nag-abot si Caspillo kag ginhagad niya si Jacome nga makadto sa likod sang balay sang tanod commander tubtob nga may komosyon nga natabo.
Ginbuyagyag ni Christy nga may daan nga hiligut-anon ang iya utod kag live-in partner.
Napilasan sa liug kag likod si Jacome nga gindala sa ospital, samtang may pilas naman sa tangkugo, dughan, kag likod si Caspillo nga gintunaan sang iya kamatayon.
