ILOILO — Patay ang isa sa tatlo ka mga pahinante samtang pilason ang duha pa kag ang driver sang delivery truck nga may karga nga isda sang nagtakilid sa Barangay San Juan, Barotac Viejo mga las-5 kaina sang kaagahon.
Suno kay Police Master Sergeant Rio Dawn Mitchelle Candelario, imbestigador sang Barotac Viejo Municipal Police Station, nagapadulhog ang truck sang wala nagkagat ang preno, nadulaan sang kontrol sa manibela ang driver gani natumba ang truck.
Napilasan sa ulo ang pahinante nga si alyas Arnulfo, 55-anyos nga residente sang Barotac Nuevo, sang napilpilan sang puwertahan sang truck. Gindala pa siya sa ospital pero gindeklarar nga dead-on-arrival.
May mga gasgas man sa nagkalain-lain nga parte sang lawas ang duha pa ka pahinante, samtang nagreklamo sang pagpalanakit sang paa ang driver kag may pilas man sa likod.
Maluwas nga kurbadahon kag accident prone ang karsada, ginalantaw man nga rason sang aksidente ang kabug-at sang karga sang truck.
Halin sa Estancia ang truck nga puno sang karga nga bangrus nga dal-on kuntani sa Iloilo City.
Sa pagpangusisa sang police, ginpadala lang ang na-aksidente nga truck agud mag-rescue sa isa pa ka truck tungod na-aberiya sa Estancia. — Aksyon Maria Kayla Tingzon
