ILOILO — Dead-on-arrival sa ospital ang 38-anyos nga residente sang Barangay Barrido, Ajuy sang gintiro sa liug sa nasambit nga lugar kagab-i.
Suno kay Police Staff Sergeant John Cesar Bantigue, imbestigador sang Ajuy Municipal Police Station, ginsita sang biktima nga si Ron ang mag-amay nga suspek nga nagasinggitan samtang nagapangita sang ila nga tricycle.
Kaupod ni alyas Ron ang tanod nga nagsita sa mag-amay nga kanday alyas Dan, 27-anyos, kag Dino, 51-anyos,nga lunsay residente sang Barangay Barrido.
Nagdumugay ang biktima kag si Dan. Sang natumba si Ron, gintiro siya ni Dan.
Ginpunggan pa sang tanod suno kay PSSG Bantigue ang mag-amay apang wala nagpamati kag gintayaan pa siya sang pusil.
Sa imbestigasyon sang mga pulis, wala nag-intindihanay ang biktima kag mga suspek nga naka-inom.
Nadakpan sa hot pursuit sa Malayu-an, Ajuy ang amay, samtang at-large si Dan.
Pasakaan sang kaso nga murder ang mag-amay, suno sa pulis. — Aksyon Angel Mae Ciudad
