ILOILO — Natiruhan sa dughan ang isa sa duha ka subjects sa drug buy bust operation sa Barangay Igcocolo, Guimbal sang nagbato sa pulis kagab-i, Oktubre 4.
Suno kay Police Captain Melvin Mercado, hepe sang Guimbal Municipal Police Station, nagpalagyo ang subject nga si alyas Noel, 45-anyos nga taga-Cansilayan, Tigbauan kag nagdalagan patakas.
Apang nadakpan sang mga naka-standby nga police back.
Gintuyo kuhaon ni Noel ang pusil sang pulis gani may natabo nga agaway. Nagpalupok sa dalom ang pulis bilang warning gani nagdistansiya ang subject.
Sang nakadistansiya, ginhabuyan ni Noel sang granada ang pulis pero wala ini naglupok tubtob nga natiruhan sang pulis ang subject.
Sa drug bust operation, duha ka sachets sang suspected shabu nga ginabanta nagabug-at sang 10 grams kag may standard drug price nga P68,000 ang nakuha kay Onyok, 33-anyos sang Barangay Cansilayan, Tigbauan
May dugang pa nga duha ka sachets nga nakuha sa sling bag ni Noel pagkatapos niya matiruhan nga ginabanta nagabug-at sang 8 grams.
Suno naman sa magulang ni Noel nga si alyas Intsik, wala nagagamit kag nagabaligya sang illegal nga druga ang iya manghod kag nadalahig lang siya.
Nagabiyahe sang habal-habal si Noel kag siya ang masami gina-arkilahan sang main subject nga si alyas Onyok nga sakyan kon may magpasarahe.
Bulag si Noel sa asawa kag may bata nga babaye nga naga-eskwela pa.
Ginpabutyag ni Intsik nga ipa-blotter nila ang natabu tungod wala sang sala ang iya manghod. — Aksyon Maria Kayla Tingzon
