ILOILO CITY — Nag-ako ang 15-anyos nga estudyante nga siya ang nagpadala sang bomb threat sa ila eskwelahan sa Fort San Pedro National High School sang Nobyembre 19.
Suno kay Police Captain Melchor Tolentino, hepe sang Iloilo City Police Station 1, may nabasahan nga mensahe sang bomb threat sa social media ang suspect kag iya ginkopya.
Gin-islan niya ang detalye sang mensahe kag ginbutang nga may gintanom nga bomba sa ila eskwelahan. Ginpadala sang solterito ang bomb threat paagi sa Messenger sa iya classmate nga babaye gamit ang iya personal nga account sa Facebook.
Tungod sa kakugmat, gin-screenshot sang classmate ang mensahe sang suspect, kag gin-send sa mga group chats tubtob nga nakalab-ut sa mga manunudlo sang eskwelahan.
Sang naglapta na ang mensahe, may nagpalab-ot sang impormasyon sa kapulisan. Tungod sini, nagresponde ang kapulisan kag ginpangita ang suspect nga amo ang ginhalinan sang bomb threat.
Wala nakita sang kapulisan ang suspect pero na-istorya nila ang lola niya. Kahapon, nagpadulong sa Police Station 1 ang lola dala ang iya apo kag gin-turn over sa kapulisan.
BORED LANG?
Nagrason ang 15-anyos nga estudyante nga na-bore siya sang ginkopya ang mensahe sang bomb threat kag ginpadala sa iya classmate.
Ini suno kay Police Captain Tolentino, sang na-usisa ang suspect nga gin-surrender sang iya lola sa kapulisan.
Gin-ako sang solterito nga ang pamahog lang sa Fort San Pedro National High School ang iya ginhimo kag nagpaathag nga wala siya sang kahilabtanan sa iban nga pamahog sa nagkalain-lain nga eskwelahan sa siyudad kag probinsiya sang Iloilo.
Ang intensyon lang suno sa iya sang solterito nga ipadala ang mensahe sa Messenger. — Aksyon Angel Mae Ciudad/Paula Elambayo
