ILOILO CITY—Dies y seis anyos kag nagabusong ang pinakabata nga Human Immunodeficiency Virus (HIV) positive ang na-record sang Iloilo City Health Office.
Suno kay Dr. Odette Villaruel, HIV coordinator kag head sang Social Hygiene Clinic, commercial sex worker ang amo nga menor-de-edad.
Nagguwa man nga reactive ukon positibo man sa amo nga balatian ang iya nga partner, dugang pa ni Villaruel.
Sa record sang CHO, nagapabata nga pabata ang nagakatapikan sang balatian ilabe na sa mga edad 17, 18, kag 19 kag kalabanan mga estudyante.
Samtang, may regular man nga check-up kag testing nga ginahimo ang CHO sa mga commercial sex workers gani madasig nga mahibaluan kon sin-o ang HIV positive agud ma-refer sa treatment facility.
MAKA-ALARMA
Nagapabata nga pabata sa 17, 18, kag 19-anyos ang nagakatapikan sang Human Immunodeficiency Virus (HIV) sa Iloilo City kag daku nga porsyento diri ang mga estudyante.
Suno kay Dr. Odette Villaruel, HIV coordinator kag head sang Social Hygiene Clinic, maka-alarma man ang nagadamo nga kaso sang syphilis kag gonorrhea nga nalakip sa mga sexually transmitted infections.
Sexually active kag nagapakighilawas nga wala sang condom ang kabataan subong nga henerasyon gani nagakatapikan sang balatian.
Sa record sang City Health Office (CHO), 1,770 ka HIV cases ang na-record halin 1988 tubtob Agosto 2025 kon diin ang age group nga 25 tubtob 34 ang nagapanguna, samtang 15 tubtob 24 ang nagapangaduha nga may pinakadamo nga kaso.
Nagapanguna nga mode of transmission ang lalaki nga nagapakighilawas sa lalaki, nagapangaduha ang bisexual ukon nakapakighilawas sa babaye kag lalaki, kag nagapangtatlo ang heterosexual ukon lalaki kag babaye nga pagpanghilawas.
Una na gin-report sang CHO nga 16-anyos nga nagabusong kag commercial sex worker ang pinakabata nga HIV positive sa siyudad. — Aksyon Marvin Malificiar
