ILOILO — Gintinguhaan pa nga salbaron sang iya magulang ang 16-anyos nga solterito nga napatay sang nalumos sa Nadsadjan Falls sa Barangay Passi, Igbaras mga la-1 kahapon sang hapon.
Ang Linaw Ungkoy mga 500 meters ang kalayuon sa Nadsadjan Falls.
Suno kay Police Lieutenant Hedion Cabaya Jr., deputy chief of police sang Igbaras Municipal Police Station, samtang nagakuha sang litrato ang solterito nga si alyas Yan, residente sang Barangay Riro-an, Igbaras, nakadanlog siya kag nagdiretso sa tubig.
Ginsalom pa siya sang iya magulang pero tungod sa kadalumon man sang tubig, nagpangayo siya sang bulig sa mga barangay officials kag tanod agud masalbar ang manghod.
Naglab-ot sa 30 minutos tubtob nakuha sa tubig ang solterito.
Dead-on-arrival sa ospital ang solterito.
Gin-athag naman ni Kagawad Arnold Ederadan nga malayo pa sa Nadsadjan Falls ang lugar sa diin nalumos ang solterito.
Dugang niya, kinahanglan nila mag-agi sa barangay antes makakadto sa falls kag dapat nga mag-secure sa tour guide.
Yara lang sila nga mga barangay officials kag tanod sa falls gani gilayon nga nakaresponde sang nagpangayo sang bulig ang magulang sang solterito. — Aksyon Maria Kayla Tingzon
