ILOILO CITY — Pilason nga gindala sa ospital ang 17-anyos nga solterito sang nabun-an sang buka nga botelya sa Bonifacio drive, City Proper (atubang sang MIWD) kagab-i, Hunyo 22.
Pangayaw ang 17-anyos nga taga-Aklan.
Suno sa 19-anyos nga magulang sang biktima, antes ang insidente, nagkadto lang sa iya boarding house sa Luna, La Paz ang 17-anyos kag naglantaw sila sang liga.
Ginpahayag sang magulang nga may nagreklamo sa ila nga indi makakita sang nagahampang tungod ginatabunan sang iya nga manghod.
Nanotisyaran sang magulang nga ginatulok sila sang masakit sang mga nagreklamo gani nagdesisyon na lang nga maglakat agud makalikaw sa gamo.
Pag-abot sang mag-utod sa Esplanade La Paz nga malapit sa Gaisano City Mall, ginlagas sila sang ginabanta apat ka kalalakihan, ginkastigo kag ginlampusan sang botelya, suno sa 19-anyos.
Nagpalagyo pa ang 17-anyos pero naabtan sang mga lalaki sa atubang sang building sang MIWD tubtob nga nabun-an sang buka nga botelya sang makahulubog nga ilimnon, suno sa magulang.
Sa pag-check ni Police Staff Sergeant Michael Theodore Soleño, imbestigador sang La Paz Police Station sa CCTV, ginabanta 14 ka indibidwal ang naglagas sa mag-utod nga posible taga-Rizal, La Paz.
Tripping ang ginalantaw motibo sang police sa insidente.
Nagapadayon ang hot pursuit operation sang La Paz police sa mga suspetsado.
