ILOILO CITY — Temporaryo nga indi magamit ang duha ka elevator sa overpass sa San Rafael, Mandurriao makaligad may na-trap nga solterito kahapon, Mayo 14.
Sa pagpangusisa sang Aksyon Radyo Iloilo, ginbutangan sang “under maintenance” sign ang guwa sang elevator.
Nahibaluan nga wala pa isa ka tuig sang gin-ilisan ang duha ka elevator sa overpass.
Madumduman nga wala man nagamit ang orihinal nga elevator rason nga ginpondohan sang city government sang P5.1 million agud makabakal sang bag-o.
Ginbutangan sang elevator ang overpass agud indi mabudlayan sa pagsaka ang mga senior citizens, persons with disabilities (PWDs) kag mga nagabusong.
Kahapon, ginpahayag sang taga-City Engineer’s Office nga first time nga natabo nga may na-trap sa elevator.
Natabuan nga nag-lunch break ang job hire nga nagabantay sang nagsakay ang menor-de-edad kag gulpi lang nag-error ini samtang nagapanaug.
Nag-panic ang solterito gani wala niya napindot ang alarm button. Mga lima ka minutos nga na-trap ang menor antes siya napaguwa sang operator.
