ILOILO — Nadakpan ang suspect nga nagbilin sang plastic nga suludlan nga may unod nga granada sa tiyangge sa Barangay Rosario, Dumangas sang Septiyembre 6 sang gab-i.
Suno kay Police Master Sergeant Efren Gonzaga, imbestigador sang Dumangas Municipal Police Station, nakabaton sila sang tawag halin sa barangay kapitan nga may balunan nga may unod nga mga granada nga ginbilin sa tiyangge.
Naglakat ang suspect kag sa iya pagbalik, ginsaylo niya ang balunan sa balkonahe sang balay sang tag-iya sang tiyangge.
Na-identify naman sang tag-iya sang tiyangge ang suspect nga ginkilala kay alyas James, 46-anyos nga residente sang amo man nga barangay.
Hubog ang suspect sang ginbilin ang balunan sa tiyangge suno sa police.
Nagpauli ang suspect gani pag-abot sang police didto siya gindakup sa ila balay.
Sang gin-usisa ang suspect sa may kaangtanan sa rason sang iya pagbilin sang balunan nga mga granada kag kon diin niya ginkuha nagpamalibad siya nga magsabat.
Wala sang away sa tunga sang suspect kag tag-iya sang tiyangge.
Ginpabutyag man ni Gonzaga nga ginareklamo si James sa barangay tungod sa pagmaoy pero wala siya sang record sa police.
Gin-turnover sa Provincial EOD (Explosive Ordnance Disposal) and Canine Unit ang mga granada agud ma-classify ini. — Aksyon Maria Kayla Tingzon
