Patay na sang nasapwan ang duha ka mangingisda nga una gin-report nga missing sa baybayon nga sakop sang Brgy. Sebaste, Sibunag, Guimaras sang Lunes, Hulyo 21.
Ginkilala ang mga mangingisda kanday Vincent Paul Valles, 30-anyos kag Ryan Galfo, 30-anyos.
Suno kay Police Lieutenant Herbert Remegio, officer-in-charge sang Sibunag Municipal Police Station, las-9:30 sang Lunes sang gab-i sang nag-upod si Valles sa pamilya ni Galfo agud mangisda sa Inampulugan Island.
Sa imbestigasyon sang police, mabatak kuntani sang pukot ang duha pero nabudlayan tungod sa mabaskog nga balod gani naglumpat si Valles.
Tungod sini, ginhampak sang balod si Valles kag nagpalayo sa sakayan. Naglumpat man si Galfo agud salbaron si Valles pero pati siya ang napalayo sa sakayan.
Gintinguhaan man sang mga kaupdanan sang duha nga masalbar sila pero napaslawan tungod sa mabaskog nga balod.
Gilayon nag-report sa Philippine Coast Guard sub-station Sibunag kag sa Sibunag police ang mga kaupdanan nanday Valles kag Galfo.
Naghimo sang search and rescue operation ang otoridad sa lugar sang amo nga adlaw pero wala makita ang duha.
Ginpadayon sang PCG ang pagpangita sa mga mangingisda halin kahapon tubtob kaina sang aga.
Yara na sa advanced state of decomposition ang duha sang nasapwan kaina sang aga. — Aksyon Paula Elambayo
