ILOILO — — Dead-on-arrival sa ospital ang duha ka menor-de-edad nga nalumos sa farm pond sa Barangay Amamaros, Pototan.
Ini ang ginkumpirmar ni Police Staff Sergeant Richard Cabucos, imbestigador sang Pototan Municipal Police Station.
Suno kay Cabucos, naghagaray ang lima ka kabataan nga lunsay menor-de-edad nga maligo sa pond.
Pag-abot sa lugar, gilayon nga naglumpat ang siyam ka tuig nga si alyas Bebe nga amo ang una nga nalumos.
Ginbuligan pa sang 13-anyos nga si alyas Nene si Bebe, apang pati siya ang nalumos.
Gilayon nga nagpangayo sang bulig ang tatlo pa nila ka upod.
Ginabanta 100 meters ang kalayuon sang pond sa karsada kag 300 meters naman sa mga pamalay.
Base sa imbestisgasyon, wala nakabalo ang iloy ni alyas Bebe nga naligo ang iya bata.
Samtang ang 13-anyos naman ang naglisensya sa iya lola nga mang-barbecue. — Aksyon Angel Mae Ciudad
