2 ka mga atleta halin sa Western Visayas nakahimo sang record sa Palarong Pambansa sa Ilocos Norte

Duha ka atleta halin sa Western Visayas ang nagguba sang record sa Palarong Pambansa 2025 sa Ilocos Norte. Si Josh Gabriel Salcedo sang Valderrama, Antique naghimo sang bag-o nga record sa Discus Throw Secondary Boys. May kalayuon nga 45.52 meters ang winning record ni Salcedo kag nakuha ang gold medal.

Ginguba niya ang 42.86 meters nga record sa Palarong Pambansa 2023 sa nasambit nga hampang.

Samtang, si Mico Villaran sang Romanito P. Maravilla Sr. National High School sa Bacolod City ang nagguba sa 15 ka tuig nga record sa 100-meter hurdles- Secondary Boys sa Palarong Pambansa.

Sang 2010, na-record ang 14.68 seconds nga kadasigon sa nasambit nga event. Pero na-record ni Villaran ang 14.00 seconds subong nga tuig.

Suno kay Mr. Hernani Escullar, Jr., public information officer sang Department of Education – Western Visayas, nagalaum sila nga madugangan pa ang mga atleta nga makahimo sang kasaysayan sa nagapadayon nga Palarong Pambansa.