ILOILO — Nakaagum sang gasgas sa nagkalain-lain nga parte sang lawas ang mga napilasan sang nabungguan sang taxi sa Brgy. Botong, Oton kagab-i, Enero 3.
Suno kay Police Staff Sergeant Rosenie Agutaya, imbestigador sang Oton Municipal Police Station, pasado las-11 kagab-i sang nabungguan sang motorsiklo ang babaye nga nagatabok sa dalan.
Tungod sini, ginbuligan sang iya mga upod kag sang iban nga residente ang babaye nga natumba sa dalan. Samtang ginabuligan, gulpi lang sila nabungguan sang taxi nga pakadto sa direksyon sang siyudad.
Nabungguan sang taxi ang duha ka mga abyan sang babaye.
Sa imbestigasyon, wala natalupangdan sang taxi driver nga may mga nagatipon sa tunga sang dalan tungod sa ulan.
Gindala sa ospital ang tatlo ka mga napilasan nga estable na ang kondisyon.
Gin-custody sang Oton police ang driver sang motorsiklo nga nakabunggo sa babaye kag ang taxi driver pero gin-release tungod sa initial settlement.
Natalana ma-atubangay ang mga involved subong nga adlaw, suno sa pulis. — Aksyon Paula Elambayo
