ILOILO — Nag-surrender sa mga otoridad ang duha ka mga senior citizens nga may ginapangatubang nga kaso pag-abot sa Iloilo International Airport sa Cabatuan kahapon, Agosto 26.
Halin sa Singapore ang duha antes boluntaryo nga nag-surrender sa kapulisan.
Suno kay Police Captain Joebert Amado, officer-in-charge sang Iloilo City Police Station 5, nagapangatubang sang kaso nga Qualified Trespass to Dwelling sa idalom sang Revised Penal Code ang duha.
Antes nga nagpauli sa Iloilo, may koordinasyon na sa mga otoridad natuhoy sa ila pag-surrender gani ginserbe na lang ang warrant of arrest sa paluparan, dugang ni Amado.
Wala man gindetalye ni Amado ang kaso sang duha.
Sa pagpangusisa sang Aksyon Radyo Iloilo news team, may koordinasyon sa Bureau of Immigration, Local Police Units, kag Regional Intelligence para masiguro nga ma-monitor ang mga nagaguwa kag nagasulod nga mga pasahero sa paluparan antes ang natabo nga pag-surrender kag pagserbe sang warrant of arrest.
Pagkatapos sang pag-surrender, gilayon man nga nagpiyansa ang duha, suno sa police. Nagpangabay ang duha nga indi na lang pagbuyagyag ang ila identity. — ARI Trainee Robert Nietes
