ILOILO — Duha ka separado nga insidente sang ginapatihan pagpang-kidnap ang natabo sa Pavia kagab-i.
Ginabanta las-6:25 sa gab-i sang ginbangga-an, gintiro kag ginpasakay sa pula nga awto sa Brgy. Cabugao Sur, Pavia si Mark Alarcon, 44-anyos nga residente sang amo man nga lugar.
Suno kay Police Captain Ritz Field Presquito, hepe sang Pavia Municipal Police Station, nakita na sang testigo nga may awto sa kilid sang highway nga nagapondo.
Pagkatapos sang pila ka minutos, naglabay si Alarcon nga nagabisikleta kag may duha ka mga lalaki nga nagguwa sa awto.
May nabatian nga lupok sang pusil ang testigo pero wala nakita kon sin-o ang naigu tungod nalipdan sang salakyan gani nagtawag siya sa pulis.
Nag-u turn pabalik sa direksyon sang Iloilo City ang awto kag nabilin ang bisikleta nga ginasakyan ni Alarcon.
May dugo sa pader nga nagapatimaan nga napilasan si Mark. Nakita man ang basiyo sang .45 caliber.
Mga las-6:40 sang gab-i, nag-report sa police station ang iloy sang babaye nga may nagkuha sa iya bata sa atubang sang convenience store sa tabok sang plaza, ginabanta 60 meters ang kalayuon sa police station.
Ginkilala ang babaye kay Gene Stephanie Guillem, 29-anyos sang Purok 4, Pavia.Gina-imbestigaran sang pulis ang natabo kag ginahibalo kon maangut ang separado nga insidente. — Aksyon Farrah Mae Morano
