ILOILO— Patay na sang nakit-an sa sulod sang drum ang onse ka bulan nga bata nga lalaki sa Brgy. Sipitan, Tigbauan kaina sang aga.
Suno kay Police Captain Alfred Mansoy, officer-in-charge sang Tigbauan Municipal Police Station, may deperensya sa paminsaron ang iloy base sa pagpangusisa sa pamilya.
Sa imbestigasyon sang police, ginhagad sang iya live-in partner ang iloy nga magsimba kahapon sang aga pero nagpamalibad siya. Tungod sini, ginbilin ang iloy kag ang bata.
Pasado las-12 na kahapon sang udto sang nakapauli ang amay kag ginpangita ang iya mag-iloy. Nagpangayo sang bulig ang amay sa iya pamilya agud pangitaon ang mag-iloy.
Kaina sang aga, nakit-an sang pamilya ang iloy nga nagapanago sa kawayanan sakop sang Brgy. Turog-Turog nga boundary sang Tigbauan kag Oton.
Ginpamangkot ang iloy kon diin na ang bata kag ginsugid niya nga ginsulod niya sa drum ang bata, ginbayaan kag nagpanago.
Ginpahayag sang police nga madugay na nga may deperensya sa paminsaron ang iloy pero wala napabulong, suno pa sa pamilya.
Gin-turnover sang pulis sa Municipal Social Welfare and Development Office sa Tigbauan si Nene. — Aksyon Farrah Mae Morano/Paula Elambayo
