ILOILO CITY — Napatay ang duha ka mga pasahero samtang estable na ang kondisyon sang driver sang van nga nakabunggo sa puno sang kahoy ang Isuzu Traviz sa Circumferential Road 1 (C1) nga sakop sang Brgy. Balabago, Jaro kahapon, Oktubre 25.
Suno kay Police Master Sergeant Jeremy Minerva sang Traffic Enforcement Unit, halin sa Buhang Flyover kag padulong sa coastal road pa-Dumangas ang van sang natabo ang aksidente.
Sakay sang van ang driver nga si alyas ML, 50-anyos nga taga-Maasin kag ang iya mga pasahero nga kanday alyas HM, residente sang amo man nga banwa kag alyas GD nga taga-Cabatuan.
Nagaguwa sa imbestigasyon nga naglupok ang panguna nga ruweda sa tuo sang salakyan.
Nag-panic ang driver gani nadulaan sang kontrol sa manibela tubtob naglapaw sa gutter ang van kag nakabunggo sa puno sang kahoy.
Lunsay head injury tuga sang pagkabunggo sa matig-a nga bagay sa sulod sang van ang gintunaan sang kamatayon sang duha ka mga pasahero. Nagpalanakit naman ang ulo kag dughan sang driver tungod sa impact sang pagkabunggo.
Trabahante sang Marmolejo Builders Corporation ang mga sakay sa na-aksidente nga salakyan. — ARI trainee Robert Nietes
