ILOILO CITY — Duha ang patay kag 16 ang pilason lakip na ang naga-imbestigar nga police sang nadalasa sang water tanker sang liwat nag-andar kag nag-accelerate sa Baldoza, La Paz las 6:00 kagab-i, HUnyo 11.
Ginkilala ang mga napatay kanday Oliver Parreñas kag Alyas Je Ann, 14-anyos.
Suno kay Baldoza, Lapaz Barangay Kagawad Henry Zamora, una nga naglamsot ang preno sang water tanker rason nasalakay ang tricycle, lechon stand, kag parte sang botika.
Pagkatapos sang aksidente, ginguyod sang rescue truck ang water tanker agud kuntani mapahigad apang wala naka-neutral ang kambiyada sini rason nga nag-andar kag nag-accelerate rason nadalasa ang 18 ka mga indibidwal sa higad sang dalan nga nagalantaw sa aksidente.
Lakip man sa nadalasa suno kay Kagawad Zamora ang police nga naga-imbestigar sa aksidente nga ginkilala kay Police Staff Sergeant Ricky Ardamoy nga out-patient sa ospital.
Magluwas sa police nga pilason 16 ang ginabulong sa ospital.
Nagpamalibad naman ang La Paz police nga hingadlan ang iban pa nga mga pilason.
