ILOILO — Patay ang pasahero kag driver sang depasahero nga jeep sang nakabunggo sa puno sang kahoy sa Barangay Lawigan, San Joaquin kahapon sang aga, Agosto 15.
Ginkilala sang San Joaquin police ang driver sang jeep kay alyas Jayvern 32-anyos, residente sang Brgy. Cata-an sa amo man nga banwa.
Suno kay Police Master Sergeant Rex Canja, imbestigador sang San Joaquin Municipal Police Station, pabalik na sa Brgy. Lawigan ang jeep halin sa Iloilo City sang natabo ang aksidente.
Base sa imbestigasyon sang police, nadulaan sang kontrol sa manibela ang driver tungod madanlog ang dalan dala sang pag-ulan. Naglapaw sa pihak nga lane tubtob nakabunggo ang jeep sa Gmelina.
Apat ang sakay sa jeep lakip ang driver. Lunsay sila gindala sa ospital pero gindeklarar nga dead-on-arrival ang pasahero.
Napatay naman samtang ginabulong sa ospital ang driver nga may patal nga pilas sa ulo, suno kay Canja.
Padayon nga ginabulong ang duha ka iban pa nga pasahero sa ospital. — ARI Trainee reporter Robert Nietes
