ILOILO CITY — Ginabanta sa 200 tanan ka security personnel ang i-deploy sa daku nga rally sa Iloilo City sa November 30.
Suno kay Major Shella Mae Sangrines, spokesperson sang Iloilo City Police Office, may mga personnel nga halin sa Mobile Patrol Unit, nagkalain-lain nga mga opisina sang ICPO, halin sa mga police stations sa syudad nga naka-assign sa area security kag roving patrols.
May mga naka-uniform kag may naka-civilian man nga malibot sa syudad samtang naga-rally.
Nag-request man ang ICPO sang augmentation sa Police Regional Office 6 sa diin 50 ka personnel ang ginpadala halin sa Regional Mobile Force Battalion 6.
Sa pagpakig-angut ni Sangrines kay Lieutenant Colonel Jereme Belo, Chief sang City Operations and Management Unit (COMU) naplastar na kon diin nila ibutang ang mga pulis sa ila deployment.
May contingency measures naman ang ICPO kag naka full alert ang EOD kon may bomb threat.
May direct coordination man sa focal person sang grupo nga ma-rally ang ICPO.
Kapareho sang dalagku nga mga pagtililipon, ginalauman sang ICPO nga mangin generally peaceful ang rally. — Aksyon Farrah Mae Morano
