Iloilo City: Ginapatindog nga Guimaras Iloilo Ferry Terminal, wala gid natun-an suno kay Vice Gov. Vicente De Asis

By: Jocelyn Gelloagan-Maque

Wala gid natun-an sang maayo ang ginapatindog nga Guimaras Iloilo Ferry Terminal (GIFT) nga joint venture sang Iloilo City government kag Double Dragon Properties Incorporated.

Pahayag ini ni Guimaras Vice Governor Vicente De Asis matapos nabuyagyag nga masobra lang 500 square meters ang gintigana para sa ferry terminal sa malapad nga duta sang syudad sa Parola area.

Ginkadlawan pa ni De Asis ang pahayag nga world class ang ferry terminal nga butangan sang masobra 100 ka pulungkuan para sa ma pasahero.

Wala gid suno kay De Asis gintun-an ang proyekto ilabe na kon may makanselar nga mga biyahe sang pumpboats kon maglain ang panahon sa diin nagalab-ut sa libo ang nagaka-stranded nga pasahero.

Magluwas sa gamay nga terminal, ginareklamo man ni De Asis ang plano sang Double Dragon nga manukot sang 11 pesos nga terminal fee.

Daku ini nga palas-anon suno sa bise gobernador sa mga taga-Guimaras nga nagatabok kada adlaw.

Ginpahanumdom ni De Asis nga mayorya sa mga nagabiyahe halin guimaras pa-syudad ang mga Guimarasnon.