Iloilo City: Mga negosyante, porters, trisikad kag tricycle drivers sa Ortiz Wharf, nagakahangawa nga madulaan sang palangabuhian sa tion nga mahuman ang Guimaras Iloilo Ferry Terminal

By: Jocelyn Gelloagan-Maque

Madamo ang madulaan sang palangabuhian sa Ortiz Wharf sa tion magsaylo ang tanan nga pumpboat sa Guimaras Iloilo Ferry Terminal sa Parola Area, City Proper.

Ginabanta nga madulaan sang palangabuhian ang 35 ka vendors, 60 ka porters, 52 ka trisikad driver kag 15 ka tricycle drivers.

Suno kay Alberto Biñas, presidente sang Trisikad Drivers Association sa Ortiz nga ginpasalig sila ni Mayor Jed Patrick Mabilog nga hatagan san lugar sa Parola Area sa tion nga mag-operate ang ferry terminal.

Apang wala nagapati si Biñas sa pasalig sang alkalde bangud antes sang 2013 elections, nagpasalig man ini sa mga trisikad drivers nga indi pagpahalinon ang mga pumpboat sa Ortiz Wharf.