Iloilo City: Deadline sa pag-sumiter sang pangalan sang mga naapektuhan sang Super typhoon Yolanda nga wala nahatagan sang ESA, ginpalawig sang DSWD

By: Jocelyn Gelloagan-Maque

Ginpalawig pa sang Department of Social Welfare and Development (DSWD) ang deadline sa pagsumiter sang pangalan sang iban pa nga na-apektuhan sang Super typhoon Yolanda nga wala nalakip sa ginpanghatagan sang Emergency Shelter Assistance  (ESA).

Pahayag ini ni Father Marco Sulayao nga nagpadulong sa DSWD Manila agud ipanawagan kuntani nga ibasura ang Memorandum Order Number 24 nga ginabasehan sa hatagay sang ESA.

Masubo suno kay Sulayao bangud indi gid pagdulaon ni DSWD Secretary Dinky Soliman ang Memorandum Order.

Apang maayo nga balita bangud mahimo pa malakip ang pangalan sang mga wala pa nakabaton sang ESA matapos ginpalawig ang deadline.

Nagpasalig man suno kay Sulayao ang Department of Environment and Natural Resources (DENR) nga magapakigsapol sa mga concerned agencies agud istoryahan ang kontrobersiyal nga Memorandum Order.

Magluwas sa pagbasura sang memo, ginaduso man sang grupo ni Sulayao nga ihatag ang ESA sa matuod-tuod nga mga biktima sang Super typhoon nga wala sang anuman nga condition.