Iloilo City: Isa na naman ka inmate sa BJMP-Ungka, nasapwan nga patay

By: Aine Grace Bravo

Nasapwan nga patay ang isa na naman ka inmate sang Bureau of Jail Management and Penology (BJMP) sa Ungka, Jaro.

Ginkilala ang inmate kay Reynaldo Dizon, 27-anyos sang Habog-Habog, Molo. Suno kay Jail Warden Supt. Gilbert Peremne, may kaso si Dizon nga paglapas sa RA 9165 ukon Dangerous Drugs Act of 2002.

Sa initial report nga nakalab-ut kay Peremne, nakita si Dizon nga nagabitay gamit ang malong sa balayan sang second floor sang Selda Numero 19. Plano ni Peremne nga ipa-autopsy ang bangkay ni Dizon agud mahibaluan kon may foul play.

Matandaan sang Abril 29, nasapwan sa Selda Numero 20 si Krisitan Buivan kag sang Mayo 3, nasapwan naman si Lenin Gerd Salvalosa sa Selda Numero 9. Naguwa sa autopsy result sa bangkay nanday Buivan kag Salvalosa nga may foul play sa ila kamatayon.