Suspected drug personality, ginpahayag nga nagakuha sang iya supply sa Muntinlupa

Dumangas, Iloilo–Nadakpan sang gintingub nga puwersa sang Dumangas Municipal Anti-Drug Special Operations Task Group kag 3^rd Maneuver Platoon ang bag-o na-identify nga drug pusher sa banwa.

Isa ka semana nga gin-surveillance sang mga otoridad si Carsen Jim Duremdes, 27-anyos sang Cansilayan, Dumangas antes ginhimo ang buybust operation kahapon. Suno kay Inspector Francis Portunado, hepe sang Dumangas PNP, nakuha kay Duremdes ang lima ka sachets sang suspected shabu, 300 pesos nga marked money kag mga drug paraphernalia.

Natukiban nga nagkuha pa sang ginabanta P200,000 pesos nga balor sang illegal drugs sa Muntinlupa si Duremdes sang nagligad nga bulan kag amo ang ginabaligya sini sa banwa. Indi naman matumod kon diin sa Muntinlupa nagakuha sang supply sang illegal drugs si Duremdes. (Aine Grace Bravo)