Iloilo City: Coucilor Plaridel Nava, Ginkasuhan sang Kampo ni Mayor Jed Patrick Mabilog angut sa Kontrobersyal sa 3L Towing Services

Nemesio Martirez

Iloilo City — Ginbalikan sang kampo ni Mayor Jed Patrick Mabilog si Councilor Nava angut sa kontrobersiya sa 3L towing services.

Kahapon nagpasaka sang kaso nga graft ang alkalde paagi sa iya abogado nga si Atty. Mark Piad sa Office of the Ombudsman bangud sa paglapas sa section 3 paragraphs A, H kag I sang Republic Act 3019 ukon ang Anti-graft and Corrupt Practices Act.

Gin-claim sang alkalde nga gin-impluwensiyahan siya sang konsehal kag ang city council agud ipasar ang tire clamping and towing ordinance para makaganar.

Sa iya 50 ka pahina nga reklamo, ginpahayag sang alkalde nga si Nava ang nagapanag-iya sang 3L towing services baliskad sa una na gin-claim sang konsehal.

Suno kay Atty Piad, indi mahimo mangin liable si Mabilog sa pagpasar sang ordinansa bangud mismo ang alkalde ang nagmandu nga suspenderon ang implementasyon sini.