Councilor Plaridel Nava kag Mayor Jed Patrick Mabilog, naghaksanay sang nagtabu-anay ang banas sa City Comelec

Iloilo City — Ginpasalig ni Councilor Plaridel Nava nga sa kada magsumalangay ang ila banas ni Mayor Jed Patrick Mabilog, wala na sang may matabu nga komprontasyon.

Kasunod ini sang paghaksanay nanday Nava kag Mabilog kaina sa Iloilo Terminal Market.

Gin-athag ni Nava nga ang paghaksanay nila sang alkalde patimaan sang political maturity kag lauman sang mga pumuluyo nga wala na sang may matabu nga pag-singgitanay sa tunga nila sang alkalde kag konsehal.

Nagpasalig man si Nava nga indi na masulit ang natabu nga komprontasyon nila sang alkalde sa birthday ni Father Boy Celiz kag sa Iloilo Airport.

Nagsumalangay ang duha sang nagpanghatag sang Certificate of Nomination and Acceptance (CONA) sang United Nationalist Alliance (UNA) candidate sa City Comelec si Nava, samtang si Mabilog ang dinapit nga bisita sang mga vendors sang Iloilo Terminal Market.  (JoMaque)