Councilor Joshua Alim, ginbawian ni Mayor Jed Patrick Mabilog sang chairmanship sa ICUPAO kag ICAST

Iloilo City–Ginhublasan sang chairmanship sa Iloilo City Urban Poor Affairs Office (ICUPAO) kag Iloilo City Anti-Smoking Task Force (I-CAST) si Councilor Joshua Alim.

Nahibaluan ni Alim ang balita matapos ginpahibalo sang iya staff sa ginpapanaug nga executive order ni Mayor Jed Patrick Mabilog sang Lunes. Wala naman sang problema suno kay Alim kon kakasan siya sang duha pa ka chairmanship bangud ginhatag sa iya sang alkalde ang amo nga mga posisyon paagi man sa executive order.

Ginpabutyag sang konsehal nga gintaya niya sadto ang iya political career sang gin-uyatan ang ICAST tubtub napamatud-an niya sa city government nga nagmadinalag-on ang kampanya sa anti-smoking. Pamatuod dire suno kay Alim ang pagkakuha sang syudad sang Red Orchid Award kag nangin hall of famer sa amo nga kampanya. Magluwas sini, nakilala man ang syudad sa iban nga pungsod bangud sa masupog nga anti-smoking campaign.

Si Alim ang author sang ordinansa nga nagtukod sang ICUPAO kag ICAST. Una na nga ginkuhaan si Alim sang chairmanship sa Committee on Police Matters kag Committee on Rules kag ginkuha man ang iya posisyon bilang majority floor leader sa City Council. (Aine Grace Bravo)