Update: Bangkay sang katapusan nga pasahero nga missing sang nagkulob nga MB Tawash, nakita sa baybayon sang Buenavista, Guimaras!

Guimaras–Nakita na ang bangkay sang katapusan nga pasahero sang MB Tawash nga nagkulob sa Iloilo Strait sang Domingo.

Suno kay Lieutenant Junior Grade Edison Diaz, commander sang Coast Guard-Iloilo Station, nakita ang bangkay ni Shyne Matta, 30-anyos sang Sinapsapan, Jordan sa Barangay Sawang, Buenavista kagab-i. Malapit lang ini sa lugar sa diin nasapwan man nga naga-utaw-utaw ang iya tatlo ka tuig nga bata nga si CJ Gamotia kahapon sang aga.

Bangud sa pagkakita sa bangkay ni Shyne, nagsaka na sa 9 ang casualties sa trahedya samtang 32 ang nakaluwas, duha diri ang padayon nga ginabulong sa ospital sa syudad. Napatay man sa trahedya sanday Jordan Motorbanca Sailors’ Association President Larry Abella, 54-anyos kag makinista sang MB Tawash; Robin Gania, 59-anyos nga crew man sang pumpboat; Cora Ganila sang Sanao, Jordan; mag-utod nga Mark Reial kag Luke Shylle Matta sang Sinapsapan, Jordan; Cristine Darrly Vasquez sang Constancia, San Lorenzo; Mary Anne Gallego sang San Antonio, Nueva Valencia; CJ Gamotia kag Shyne Matta. (Aine Grace Bravo)