Empleyado sang LEEO sa syudad, ginsuspender matapos nadakpan sa buybust operation

Iloilo City–Gilayon ginsuspender ni Mr. Ariel Castañeda, head sang Local Economic Enterprise Office (LEEO) ang empleyado nga assign sa amo nga opisina nga gindakop matapos nakuhaan sang madamo nga sachet sang shabu.

Suno kay Castañeda, suspendido si Rigor Porras assign sa Iloilo Central Market, pending sang pag-file sang kaso batok sa iya matapos nabaklan sang shabu kag nakuhaan sang 29 pa gid ka sachet sang shabu sa isdaan sang merkado. Ginpasiguro naman ni Castañeda nga indi niya pag-i-tolerar ang sin-o man nga nagahimo sang illegalidad. Kahapon lang, ginsapol ni Castañeda ang mga market supervisors agud istoryahan ang problema sa illegal nga druga sa mga merkado.

“Planted”

Kumbinsido ang pamilya ni Porras nga gintanum lang ang ebidensiya nga shabu nga nakuha sa iya. Suno kay Rowena Roque sang Rizal Pala-Pala Dos, City Proper kag tiya sang nadakpan, nabatian gid niya ang pagsinggitan sang hinablos nga may ginadasok sa bulsa sini ang mga katapo sang City Anti-Illegal Drugs Special Operations Task Group (CAIDSOT).

Nagliligid pa si Porras samtang nagapamalibad nga mag-upod sa mga otoridad. Aminado naman si Roque nga nagagamit sang illegal drugs ang hinablos pero mabaskog sini nga ginpanghiwala ang akusasyon nga nagabaligya ini sang ginadumilian nga druga. (Aine Grace Bravo)