Iloilo International Airport Management, nagpasalig nga safe ang publiko batuk sa ‘Tanim-bala’ modus

Iloilo–Wala sang dapat kabalak-an ang mga pasahero sa Iloilo International Airport may kaangtanan sa ‘tanim-bala’ ukon ‘laglag-bala’scam.

Suno kay Iloilo International Airport Asst. Terminal Supervisor Arthur Parreño, nahibaluan sang mga personnel ang nagakatabu sa Ninoy Aquino International Airport (NAIA) terminals. Ginpasalig sini nga luwas sa amo nga modus ang bagahe sang mga pasahero sa Iloilo Airport. Madamo nga x-ray inspections kag metal detectors ang paga-agyan sang bagahe sang mga pasahero antes magsakay sa eroplano agud masiguro nga wala sang may makalusot nga ‘tanim-bala’ modus. Kabahin ini suno kay Parreño sang standard operating procedure sang paluparan para sa safety sang mga pasahero.

Ginpahibalo ni Parreño nga wala sang may na-record nga kapareho nga insidente ang Iloilo Airport sang nagtuhaw ang kontrobersiya sa ‘tanim-bala’ scam. (Aine Grace Bravo)