16-anyos nga Solterito, ginpapreso sang iya amay bangud sa pagkawat sang battery sang jeep agud ibakal sang illegal drugs!

Mina, Iloilo — Ginpapreso kag ginkasuhan sang amay sa Brgy. Cabalabaguan, Mina ang iya 16 anyos nga bata nga lalaki bangud sa pagkawat sang battery sang iya ginabyahe nga jeep agud ibakal sang illegal drugs.

Suno kay Inspector Roy Castro, hepe sang Mina Police Station, nakita sang iya tiya si alyas Nonoy nga nagkuha sang battery kag ginkarga sa motorsiklo.

Ginsugid sini sa amay ni Nonoy ang natabu gani nga nakareport gilayon sa police nga madasig naman nag-conduct sang hot-pursuit operation.

Natukiban nga ginbaligya ni Nonoy ang battery sa junk shop sa Janiuay sa balor nga P620. Gin-ako sini suno kay Inspector Castro nga ginbakal niya ang kwarta sang illegal drugs kag tsinelas.

May nakuha pa nga isa ka sachet sang suspected shabu sa solterito.

Aminado naman ang amay suno sa pulis nga problema nila ang solterito.

Nagduda ang amay nga nagabisyo ang iya bata sang na-obserbahan nga naglain ang batasan kag amat-amat nga nadula ang ila kagamitan sa balay nga ginapatihan ginabaligya ni Nonoy agud masagud ang iya bisyo. (JoMaque)