Jobhire sang NBI 6 nga suspect sa JLK Music Bar sa Smallville Complex Mandurriao, indi na ma-contact suno kay NBI 6 Director Atty. Mario Sison

Iloilo City — (UPDATE) Indi na ma-contact si Mark Blancaflor, ang jobhire sang National Bureau of Investigation nga gintudlo nagtiro patay kay Tommy Robiso sa JLK music bar sa Smallville Complex, Mandurriao kahapon sang kaagahon.

Suno kay NBI 6 Director Atty. Mario Sison, nakatawag pa sa iya si Blancaflor kahapon sang aga kag nagsugid sa iya nga nakatiro ini.

Nagpatimaan man suno sa iya si Blancaflor nga masurrender kahapon sang hapon apang wala ini nagpakita.

Gintawgan ni Sison ang cellphone number ni Blancaflor apang indi na ma-contact.

Ginkonfirmar naman ni Chief Inspector Kit Flora sang Mandurriao PNP nga magkaupod man nga naga-inom ang biktima kag suspek.

Nagsugod suno sa iya ang insidente sang nagpangihi ang biktima kag sang nagbalik sa pulungkuan, nakita nga gina-agbayan ni Blancaflor ang iya upod nga babaye.

Indi pa ma-establisar sang police kon ano ang relasyon sang babaye sa biktima kag suspek.

Nauna suno kay Flora nga ginhampak ni Robiso sang iya pusil si Blancaflor rason nga ini siya ang gintiro.

Nagpatunga pa kuntani ang kaupod nila nga si James Cua apang nasalabat man ini sa tiil. (JoMaque)