Mayor Jed Patrick Mabilog, ginpakamalaot ang tuyo nga pagsaka sang armado nga kalalakihan sa estasyunan sang Aksyon Radyo Iloilo; Alkalde, nagmandu sang imbestigasyon sa insidente!

Iloilo City — Ginpakamalaot ni Mayor Jed Patrick Mabilog ang ginhimo sang armado nga kalalakihan nga wala nagakilala sang laye kag pagbalewala sa press freedom sang mga katapo sang media.

Kasunod ini sang tuyo nga pagsaka sang armado nga kalalakihansa estasyunan sang Aksyon Radyo Iloilo sang Nobyembre 19 sang kaagahon.

Nagsulat na si Mabilog sa Regional Office sang National Bureau of Investigation (NBI) kag Philippine National Police (PNP) nga mag-conduct sang imbestigasyon sa mga insidente sa syudad partikular ang pagpangtiro gamit ang loose firearms, presensya sang gina-alegar armado nga grupo kag illegal drugs trade.

Nagpasalig man ang alkalde nga magasuporta ang city government kag magahatag sang mga kinahanglanon agud punggan ang pagpangibabaw sang mga tawo nga wala nagakilala sang kasuguan nga nagaresulta sa pagkaguba sang nagasanyog nga ekonomiya kag pagtublag sa kalinong kag katawhay sang syudad. (JoMaque)