Resolution nga ginduso ni Councilor Joshua Alim sa City Council nga nagarequest sa Kongreso sang pag-imbestigar sa tuyo nga pagsaka sang armado nga mga lalaki sa Aksyon Radyo Iloilo, ginbasura matapos nga nag-abstain ang walo ka konsehal

Iloilo City–Tatlo ka mga resolutions ang ginpresentar nanday Councilors Joshua Alim kag Plaridel Nava sa session sang City Council kahapon may kaangtanan sa tuyo nga pagsaka sa Aksyon Radyo Iloilo sang grupo ni Melvin Odicta Sr.

Apang ginpasar lang sang mga konsehal ang resolution nga nagakondenar sa insidente. Wala nakalusot ang resolution nga maga-imbestigar kuntani sa partisipasyon ni Monica Blumentrit, City Proper Kagawad Jesus “Jingjing” Espinosa sa insidente matapos nakita sa CCTV footage nga upod ni Odicta. Ginbasuran man sang konseho ang isa pa ka resolution ni Alim nga imbestigaran sang senado kag kamara de representantes ang natabu.

Walo ka mga konsehal ang nag-abstain sa botohay nga nagakahulugan sang pagpamatok sa resolution. Nag-abstain sanday councilors Julie Grace “Love-Love” Baronda, Jay Treñas, R. Leone Gerochi, Rodel Agado, Lyndon Acap, Reyland Hervias, Leizel Salazar kag Ed Peñaredondo. Nagpabor naman sa resolution sanday councilors Alim, Nava kag Armand Parcon.

Suno sa mga konsehal nga kaalyado ni Mayor Jed Patrick Mabilog, masarangan na sang local police nga solbaron ang insidente kag indi na kinahanglan ang bulig sang senado kag kamara. Ginrason ni Gerochi nga drama lang ang imbestigasyon samtang gin-athag ni Peñaredondo nga indi na kinahanglan ang imbestigasyon bangud wala man nadayon ang pagsaka sang armado nga grupo sa Aksyon Radyo.

Ang panindugan sang walo ka mga konsehal, baliskad naman sa pahayag ni Mabilog sang damlag lang nga nagahingyo sa national offices sang NBI kag PNP nga imbestigaran sang maayo ang mga insidente. Ginapa-usisa man sini ang pagpangtiro gamit ang loose firearms, presensya sang ginaalegar armed group sa syudad kag ang illegal drugs trade. (Aine Grace Bravo)