Odicta Group, nagapanguna man sa illegal gambling sa Western Visayas suno kay IPPO OIC Supt. Norberto Delmas

Iloilo City — Top 1 sa illegal gambling sa probinsya ang Odicta Group.

Ginkonfirmar ni Supt. Norberto Delmas, Deputy Provincial Director for Administration kag IPPO OIC, nga panahon pa ni anay IPPO Director Senior Supt. Cornelio Salinas sang naguwa ang impormasyon sang involvement sang gintumod nga grupo sa illegal gambling.

Ginpasa suno sa iya ni Salinas ang impormasyon sa regional command matapos nga naglapta sa rehiyon ang aktibidad sang grupo.

Posible suno kay delmas nga ang top drug personality sa syudad nga si Melvin Odicta, Sr. amo man ang lider sang grupo.

May posibilidad man suno kay Delmas nga wala na direkta nga nagapadalagan sang operasyon ang Odicta Group kundi nagapamorsyento na lang.

Una na ginbuyagyag ni PDEA 6 Director Paul Ledesma nga magluwas sa illegal drugs, involved man sa illegal gambling si Melvin Odicta, Sr.

Nabuyagyag ang identity ni Odicta matapos ginkonfirmar ni Ledesma kag ni Senior Inspector Donel Rejis sang ICPO-Intelligence Section sa kuha sang CCTV footage nga amo ang lider sang grupo nga tuyo magsaka sa Aksyon Radyo Iloilo sang nagligad nga semana.

Nagpasalig si Delmas nga ginahimo sang IPPO ang tanan agud ma-neutralize ang grupo paagi sa wala-tuo nga mga operasyon. (JoMaque)