Aksyon Jun Capulot, nagapati nga mangin madinalag-un ang kawsa sang Aksyon Radyo Iloilo kontra sa illegal nga druga!

Iloilo City–Nagapati si Aksyon Jun Capulot nga mangin madinalag-on ang kawsa sang Aksyon Radyo Iloilo kontra sa kriminalidad kag illegal nga druga.

Sa iya nga mensahe sa culmination sang vigil kag candle lighting activity kaupod ang nagkalain-lain nga sector sa idalum sang Aksyon Radyo Iloilo kagab-i, ginpahayag sini nga para sa tanan ang pagpakig-away sang estasyunan nga madula kag mapukan ang mga illegal activities sa syudad. Para man suno sa iya mga buwas-damlag sang ulihi nga henerasyon ang krusada sang estasyunan batuk sa illegal drugs.

Gintawag naman sini nga NPA ang tatlo ka mga konsehal sa syudad nga nagpanindugan agud imbestigaran ang tuyo nga pagsaka sang grupo ni PDEA 6-identified top drug personality Melvin Odicta Sr sa Aksyon Radyo Iloilo. Ang NPA suno kay Aksyon Jun nagatumod kanday councilors Plaridel Nava, Armand Parcon kag Joshua Alim.

Nagpasalamat si Aksyon Jun sa tanan nga nagsakdag sa kawsa sang Aksyon Radyo Iloilo kag nagsikway sa media repression. (Aine Grace Bravo)