Dealer sang Mitsubishi Montero Sports sa Iloilo, indi makasiguro sa rason sang Sudden Unintended Acceleration sang salakyan sa balay sang Pamilya Servania sa Mandurriao!

Iloilo City — Indi makasiguro ang Avescor Motors, dealer sang Mitsubishi Montero Sports kon bala technical, electrical ukon mechanical malfunction ang pagkabunggo sang salakyan sa balay ni Cyril Servania sa Monterosa Subdivision sa Mandurriao.

Paathag ini ni Allan Palacios, Vice President for Operations sang Avescor Motors nga nagkadtu sa lugar kag ginlantaw ang sitwasyon.

Indi man makapat-od si Palacios nga sala sang driver ang natabu nga ginkabangdan sang sudden unintended acceleration ukon pagbutyog sang Montero Sports kag nagsulod sa balay sang pamilya Servania.

Nagpasalig si Palacios nga ila tipunon ang tanan nga data agud ipadala sa Mitsubishi Motors Philippines.

Ginapanawagan man ni Palacios sa tanan nga nagapanag-iya sang Montero Sports nga dal-on ang salakyan sa Avescor Motors agud nga ma-diagnose kag mangin kampante sila samtang nagabiyahe sa dalanon.

Nagpasalig man ini nga libre ang pagpang-check up sang salakyan magluwas lang kon may balaklon nga spare parts.

Ginapanag-iyahan ni Servania ang Montero Sports kag ginamaneho sang tiyo nga si Gregorio Deloeste. (JoMaque)