Mga Ro-Ro vessels kag Fastcraft halin Iloilo padulong sa Bacolod City and vice versa, ginpasugtan nga makabiyahe matapos gin-kanselar sang Philippine Coast Guard

Iloilo City — (UPDATE) Gintugutan na sang Philippine Coast Guard nga makabiyahe ang mga roro vessels kag fastcraft halin Iloilo padulong sa Bacolod City and vice versa kaina sang aga.

Nagdesisyun ang PCG nga dulaon ang suspension sang biyahe alas 10 kaina sang aga bangud ang Northern Negros lang ang napa-idalum sa Signal Number 1 sang Bagyo Nona kag indi man apektado ang Bacolod.

Suno kay Coast Guard Iloilo Station Commander Lieutenant Joemark Angue, regular naman ang schedule sang biyahe sang roro vessels kag pumpboat sa syudad padulong sa Guimaras and vice versa.

Kanselado sa gihapon suno sa iya ang biyahe sang barko padulong sa Manila, Mindoro kag Cebu bangud sang Storm Signal Number 1, 2 kag 3 sa Southern Luzon kag Northern Visayas.

Stranded naman ang 363 ka mga pasahero sa Iloilo pier padulong sa Cebu.  (JoMaque)